L’esplendor de la Ilustración
Nel sieglu XVIII la institución académica va vivir, per primer vegada na so historia, momentos de gran lluz. El sieglu inauguróse con una nueva ferramienta llegal, promulgada en 1707, destinada a rexir la vida académica: los llamaos Estatutos Nuevos, que son, en realidá, un treslláu de los citaos Estatutos de 1618. Mientres esta centuria, les idees de la Ilustración van tener un pesu notable na actividá académica y van traducise n'iniciatives del mayor interés.
L'estímulu del Padre Feijoo
En 1709 llega a Uviéu como llector del monesteriu benedictín de San Vicente frai Benito Jerónimo Feijoo. La so presencia nel monesteriu y na cátedra universitaria y los sos contactos con xentes ilustraes de la ciudá constitúin un verdaderu estímulu pa la sociedá que la arrodiaba. Ye equí onde redacta dos de les obres más influyentes del sieglu XVIII español: el Teatro crítico universal y les Cartas eruditas y curiosas, que dan gran sonadía a Uviéu y a la so universidá. Acompañáu d'otros monxos de San Vicente y de dalgunos más d'otres órdenes relixoses, introduz na universidá y na sociedá asturianes les idees ilustraes qu'años más tarde van fructificar en grandes llogros, dalgunu de los cualos, como la nueva biblioteca de la universidá y el plan d'estudios de 1774, viéronse fechos realidá de la mano d'otru asturianu famosu, Pedro Rodríguez de Campomanes.
La nueva biblioteca de Manuel Reguera
Sobre la vieya llibrería universitaria, probe de fondos y menguada d'espaciu, va llevantase un nuevu establecimientu bibliográficu, plasmación de les más xenuines idees ilustraes. Col dineru destinao a la edificación d'una biblioteca nel Colexu de San Matíes, de la Compañía de Xesús, que los xesuites rechazaron, Campomanes ordena emplear esi dineru nel establecimientu d'una nueva biblioteca na universidá. Les obres, llevaes a cabu cola aportación de la Xunta Xeneral del Principáu, empezaron en 1765 y la biblioteca abrióse al públicu en 1770 con unos fondos selectos qu’aumentaron considerablemente hasta finales del sieglu. L’acabante de crear biblioteca quedó instalada nos nuevos pisos llevantaos nos llaos de mediudía y poniente, según proyectu y planos del gran arquitectu de la Ilustración asturiana Manuel Reguera. Esti nuevu espaciu bibliográficu constitúi’l primer gran cambéu del edificiu universitariu dende la so fundación.
L’innovador plan d’estudios de 1774
La educación foi una de les grandes esmoliciones de los homes ilustraos y a la so reforma allegaron los sos esfuerzos aquellos próceres, ente los que destaca Campomanes. Les reformes de Felipe V y Fernando VI preparen el camín pa les grandes tresformaciones que se diben producir sobre’l reináu de Carlos III, la más importante de les cuales foi la entrada en funcionamientu en 1774 d'un nuevu plan d'estudios, bien innovador en munchos aspectos, particularmente, no que se refier a nuevos métodos d'estudios y al cambéu radical de los llibros de testu hasta entós utilizaos nes cuatro facultaes existentes. En 1786 afitáronse estudios de Medicina, cola dotación de dos cátedres por impulsu del bispu Agustín González Pisador, que tuvieron una vida efímera, pues perdiéronse en 1806.
