El secretariu xeneral ye nomáu pol rector d'ente funcionarios públicos que cumplen servicios na Universidá d'Uviéu, pertenecientes a cuerpos o escales pa que'l so ingresu exixa tar en posesión del títulu de doctor, llicenciáu, inxenieru, arquitectu o equivalente. Tamién ye secretariu del Claustru, del Conseyu de Gobiernu, del Conseyu Rectoral y de la Xunta Electoral Central.

Correspuenden al secretariu xeneral les siguientes funciones:

• La fe pública de los acuerdos de los órganos colexaos, según la formación y custodia de los llibros d'actes de los mesmos.
• La espedición de certificaciones de les actes y acuerdos de talos órganos, lo mesmo que de cuantos actos o fechos consten na documentación de la universidá, ensin perxuiciu de la competencia de los secretarios de los centros, departamentos y Institutos.
• La dirección, xestión y custodia de los arquivos y rexistros, según la custodia del sellu oficial de la universidá.
• El sofitu alministrativu y xurídicu a los órganos de gobiernu pal desarrollu de les sos competencies.
• La dirección y coordinación de la Secretaría Xeneral de la universidá.
• La publicación oficial de los actos y disposiciones normatives de la universidá cuando llegalmente proceda.