La ufierta d'estudios de máster universitariu supón una apuesta pola internacionalización, la collaboración con otres universidaes y l'alcuentru col sector empresarial. Estos programes de posgráu tán empobinaos al desarrollu de les capacidaes más afayadices pal futuru profesional escoyíu.
La Universidá d'Uviéu, al traviés del Centru Internacional de Posgráu, realiza una apuesta importante pola internacionalización y la collaboración empresarial na so ufierta de másteres universitarios. Estos programes de posgráu tienen, pelo xeneral, una duración mínima d'un cursu académicu a tiempu completu (60 créditos ECTS) y una máxima de dos cursos académicos (120 créditos ECTS). Los estudios acaben cola ellaboración y defensa del trabayu fin de máster.
La Universidá d'Uviéu ufierta un ampliu catálogu de másteres universitarios:
Los estudios de Máster Universitariu de la Universidá d'Uviéu organícense en 60 titulaciones oficiales que tomen les cinco estayes de conocimientu y tán adaptaes al Espaciu Européu d'Educación Superior.
- Másteres internacionales. La Universidá d'Uviéu tien conveniu con 23 universidaes en más de 11 países y socios en terceros países. Ente les titulaciones internacionales esisten 5 Másteres Erasmus Mundus y otros 10 Internacionales con alcuerdos de doble titulación coles universidaes de Pau, Clermont-Ferrand, Hochschule Karlsruhe, Silesia, Bologna, Western New México (EEXX) y Monterrey (México).
- Másteres interuniversitarios. La Universidá d'Uviéu ufierta 7 programes en collaboración con 21 universidaes españoles, a les que se sumen 14 que participen nel Máster en Química Teórica y Modelización Computacional.
- Másteres académicu-profesionalizantes. Estos títulos caracterízense por ufiertar un modelu formativu empobináu a la práctica profesional, de mou que les más de 250 entidaes que collaboren na docencia ufierten práctiques a los estudiantes y cotutelen el so trabayu fin de máster.
- 8 dobles titulaciones: La Universidá d'Uviéu ufierta les siguientes dobles titulaciones de máster: Alministración y Dirección d'Empreses, Biotecnoloxía del Mediu Ambiente y la Salú, Ciencies Analítiques y Bioanalítiques, Formación del Profesoráu d'Educación Secundaria Obligatoria, Bachilleratu y Formación Profesional, Historia y Análisis Sociocultural, Llingua Española y Llingüística, Inxeniería Mecatrónica y Prevención de Riesgos Llaborales.
- Enseñanza billingüe: La institución académica ufierta 19 másteres universitarios que necesiten un nivel B1 d'inglés pa poder cursalos. Ocho d'estos programes dánse namás que n'inglés.
- Másteres Erasmus Mundus: la Universidá d'Uviéu coordina los másteres Erasmus Mundus n'Enfermería d'Urxencies y Cuidaos Críticos; Salú Pública en Desastres; Tresporte Sostenible y Sistemes Eléctricos de Potencia ya Inxeniería Mecatrónica. Cada ún d'estos cuatro títulos ta xestionáu pol consorciu del que formen parte otres universidaes europees, según empreses ya instituciones.
Oxetivos de los másteres universitarios
Los oxetivos de los másteres universitarios definiéronse teniendo en cuenta les directrices del R.D. 1393/2007, de 29 d'ochobre, de manera coherente colos derechos fundamentales y d'igualdá ente homes y muyeres (conforme a lo dispuesto na Llei 3/2007, de 22 de marzu, pa la igualdá efectiva d’homes y muyeres), colos principios d'igualdá d'oportunidaes y accesibilidá universal de les persones con discapacidá (conforme a lo dispuesto na Llei 51/2003, de 2 d'avientu, d'igualdá d'oportunidaes, non discriminación y accesibilidá universal de les persones con discapacidá), según los valores propios d'una cultura de la paz y de valores democráticos (según recuéyese na Llei 27/2005, de 30 de payares, de fomentu de la educación y cultura de la paz).
En toos ellos búscase qu’el graduáu tenga un conocimientu correctu de los derechos fundamentales, d'igualdá ente homes y muyeres, lo mesmo que de los principios d'igualdá d'oportunidaes y d'accesibilidá universal de les persones discapacitaes.
Datos de Contactu
- Dirección:
- Edificio Histórico. Plaza de Riego s/n 33003 - Oviedo
- Teléfonu:
- 985 10 49 18
- Corréu electrónicu:
- sec.masteres@uniovi.es
