Más de 500 profesores y profesionales de la educación van aldericar güei y mañana nel Campus de Llamaquique sobro'l futuru de la enseñanza cimera nes XVI Xornaes Internacionales d'Innovación Docente de la Universidá d'Uviéu. Estes xornaes, que lleguen a la so decimosesta edición con un récord de participación, tán entamaes pol Institutu d'Investigación ya Innovación Educativa (INIE) de la universidá asturiana, adscritu al Vicerrectorado de Polítiques de Profesoráu. 

Les xornaes fueron inauguraes nel salón d'actos de la Facultá de Formación del Profesoráu y Educación cola presencia de Pedro Alonso, vicerrector de Polítiques del Profesoráu en funciones; Lourdes Villalustre, directora del INIE, Celestino Rodríguez, decanu de la esta facultá; y Cristina González Morán y David Artime, directora xeneral d'Universidá y director xeneral d'Inclusión Educativa ya Innovación, respectivamente, del Gobiernu d'Asturies. 

El vicerrector destacó que, ente les llínees temátiques de les xornaes, atópense les nueves metodoloxíes y técniques docentes, y les tecnoloxíes emerxentes pa favorecer el procesu d'enseñanza-aprendizaje onde se punxo'l focu na irrupción de la intelixencia artificial nel ámbitu educativu. Nestos aspeutos, van centrase les dos conferencies principales, la conferencia inaugural impartida por Davinia Hernández Lleo, catedrática del Departamentu de Tecnoloxíes de la Información y les Comunicaciones de la Universidá Pompeu Fabra, y la conferencia de clausura a cargu del decanu de la Facultá de Formación del Profesoráu y Educación y catedráticu de Psicoloxía Evolutiva y de la Educación, Celestino Rodríguez. Na primera, va poner de relieve cómo la intelixencia artificial tresforma y condiciona la evaluación de los aprendizaxes, lo qu'implica repensar el so papel nos procesos formativos. Na segunda, va analizase y va aldericar sobro'l futuru de la educación, considerando'l papel de la innovación y l'investigación como los principales motores de cambéu que promueven la tresferencia educativa. 

El programa de les xornaes, qu'anguaño lleva por lema Xuna mirada escontra la universidá del futuru, inclúi un total de 238 contribuciones o esperiencies innovadores d'espertos de más de 50 instituciones nacionales ya internacionales de distintes árees de conocencia. Estes contribuciones van presentar a lo llargo de los dos díes de forma presencial y online y van tar acompañaes de dos paneles d'espertos. El primeru de los paneles va ser un espaciu de formación práctica impartíu polos responsables de los proyectos consideraos nesta edición como referentes d'innovación docente y que reciben una reconocencia mientres les xornaes col primera, segundu y tercer premiu a la innovación acordies con les valoraciones otorgaes polos miembros espertos del Comité d'Innovación Docente de la Universidá d'Uviéu. El segundu de los paneles, coordináu pol director del Departamentu de Ciencies de la Educación, Alejandro Rodríguez, va poner el focu nel rol del profesoráu na universidá del futuru cola intervención conxunta de Miguel Ángel Montoya, del Institutu pa la Educación del Futuru del Tecnolóxicu de Monterrey; M. Paz Prindes, catedrática de Tecnoloxía Educativa de la Universidá de Murcia, y David Álvarez García, director d'área de Docencia de la Universidá d'Uviéu.

Mientres estes xornaes, que non solo traten d'amosar la innovación sinón de ser parte d'ella, los participantes van tener la oportunidá de somorguiase nuna esperiencia innovadora al traviés d'una actividá online gamificada pa favorecer l'alderique a partir de les innovaciones presentaes en más de 100 comunicaciones online. Con esta actividá, pretende dase respuesta a los retos a los que s'enfrenta la universidá y l'educación nel futuru.

Nesta nueva edición de les xornaes amontóse la presencialidad y l'apertura escontra distintes instituciones que comparten cola Universidá d'Uviéu les sos moliciones por una universidá calidable y acorde a les demandes d'una sociedá cada vez más digitalizada. Asina, les Xornaes Internacionales d'Innovación Docente de la Universidá d'Uviéu fueron creciendo en participación ya impactu mientres los postreros trés años y son un reflexu del interés de los profesionales de la educación pola innovación, un aspeutu fundamental ya intrínsecu a la práctica docente calidable.