La Universidá d'Uviéu fixo pública la cuarta llista d'almitíos de la fase A, la primera de les fases B y C. Los estudiantes almitíos tendrán de formalizar agora la so matrícula del 22 al 28 d'agostu. Quien nun formalice la matrícula va dexar la plaza llibre y va correr la llista d'axudicaciones. El Vicerrectorado d'Estudiantes y Empleabilidá recuerda la obligación d'anovar la solicitú para la llista d'espera para aquellos estudiantes que nun llograren plaza en nenguna titulación o que nun se matricularon de la plaza asignada. El periodu de reclamaciones tamién va tar abiertu dende'l 22 al 28 d'agostu. El 30 d'agostu publicará la quinta llista d'almitíos de la fase A y la segunda axudicación de places de les fases B y C. 

Les notes de corte d'esta cuarta axudicación son provisionales, yá que a midida que queden places llibres dirán cubriéndose con estudiantes en llista d'espera. Nesta fase, los estudios de grau con nota d'accesu más alta son: doble grau n'Inxeniería Informática del Software y Matemátiques (13,402), doble grau n'Inxeniería Informática en Tecnoloxíes de la Información y Ciencia ya Inxeniería de Datos (13,336), doble grau en Matemátiques y Física (13,033 Opción A y 13,384 Opción B), grau en Medicina (12,905), grau n'Odontoloxía (12,66), grau en Biotecnoloxía (12,600), grau en Matemátiques (12,45), grau en Enfermería-Uviéu (12,384) y grau en Enfermería-Xixón (12,192).