L'artista asturianu César Ripoll (Uviéu, 1976) esibe na Sala d'Esposiciones de la Universidá d'Uviéu amosar Idees, memoria y reminiscencies…, integrada por 26 escultures que tienen como elementu conector el formigón. La inauguración va tener llugar esta tarde, a les 18:00 hores, cola presencia, amás del propiu artista, de la vicerrectora d'Estensión Universitaria y Proyección Cultural, María Pilar García Cuetos, y la catedrática d'Hestoria del Arte y comisaria de la esposición, Soledad Álvarez.

L'amuesa va poder visitase del 31 de xunetu al 1 de setiembre nel Edificiu Históricu de la Universidá d'Uviéu, n'horariu de 11:00 a 14:00 y de 16:00 a 19:00 hores de llunes a vienres; de 10:00 a 19:30 hores de manera ininterrumpida los sábados y de 10:30 a 14:30 hores los domingos y festivos. 

César Ripoll esibe nesta esposición la evolución de la so esperimentación plástica, que se basa en trés preceptos: les idees, la memoria y les reminiscencies. Les obres qu'acueye la Sala d'Esposiciones de la Universidá d'Uviéu definen eses idees primixenies, onde la memoria actúa como fonte de conocencia y la reminiscencia como evocadora d'alcordances venceyaes cola vida. 

El formigón como elementu conector

L'elementu conector ente eses trés fontes d'inspiración ye'l formigón, un material utilizáu dende la dómina romana y que César Ripoll pigmenta pa dar distintes tonalidaes y testures variables a les sos obres. Con elles, representa oxetos lúdicos como aviones, barcos o tarabiques, cola papiroflexa tradicional como fórmula pa recordar la etapa educativa. Tampoco falten bolígrafos o lápices, nin formes xeométriques que simbolicen satélites, gotes, güevos y otros elementos rellacionaos cola llegada de la vida. Les escultures recuerden tamién a pilastres, columnes, conos y pegollos, basaos nes construcciones antiguu y contemporaneu. Llenzos blancos con incrustaciones de pieces d'óxidu y xuna serie de grabaos monotipos completen l'amuesa, que se dispon na sala arrexuntaes en families temátiques.

García Cuetos describe l'amuesa de César Ripoll como un aponderamientu a la cencellez”. Destaca la vicerrectora nel catálogu que l'autor ye “un ceador polifacéticu” que se sintió artista dende neñu y presenta na Sala d'Esposiciones de la Universidá d'Uviéu xuna serie d'escultures “de formes simples y de xuegos llimpios de volumes, tres les que s'escuende xuna cuidadosa reflexón al pie de un control rigorosu de los materiales y la técnica”.

“Tamos énte una persona inquieta por naturaleza, qu'esperimenta y caltien xuna permanente pulsión creativa, pero qu'afigura la so obra con depuración y lo que podemos definir como la difícil facilidá”, sorraya la vicerrectora d'Estensión Universitaria y Proyección Cultural al faer fincapié na cencellez que presenten les pieces de César Ripoll. 

A xuiciu de García Cuetos, les propuestes de César Ripoll son “frutu d'una sollerte mirada que foi encetando distintos aspeutos qu'atraxeron el so interés”. N'Idees, memoria y reminiscencies… presenta la so ellaboración creativa alredor del universu, de lo telúrico y la materia de les alcordances, porque si daqué interésa-y especialmente al artista ye la redolada físico y espacial del ser humanu y de la so obra. “Bastante ye que, quixo dedicar la investigación de la so tesis doctoral precisamente a Herminio, un artista que se caracteriza pola so investigación sobro ciencia y arte, xeometría y espaciu”, destaca la vicerrectora.

Pela so parte, Soledad Álvarez afirma que la esposición Idees, memoria y reminiscencies… ye “un bon esponente del inxeniu creativu que vien demostrando l'artista asturianu dende los entamos de la so trayectoria”. La catedrática n'Hestoria del Arte detalla que les creaciones de César Ripoll “son consecuencia d'un procesu de cuatro fases prácticamente simultánees que pasen pola observación, l'afayu, la imaxinación y el tresformamientu”.

“L'afayu del soporte objetual nun ye ayenu a la idea que va sofitar conceptualmente la obra, que nesta amuesa parte de la esperiencia vital del artista, archivada na memoria como docente, padre y maríu, y como observador comenenciudu polos elementos del cosmos y los fenómenos naturales”, sorraya la comisaria de la esposición. 

Pa Álvarez, les obres que se van amosar na Sala d'Esposiciones de la Universidá d'Uviéu representen “un pasáu y un presente, al traviés de les vivencies, memories ya inxeniu d'un artista versátil nes formes y los llinguaxes espresivos, rápido na mirada, imaxinativu énte los afayos ya inquietu ya incansable nel trabayu”. 

Trayectoria vital

César Ripoll ye escultor y doctor n'Hestoria del Arte pola Universidá d'Uviéu. La so carrera artística empezó fai más de dos décades y atropa numberoses esposiciones, tantu individuales como colectives. Suma tamién más d'una decena d'escultures n'espacios públicos de la rexón, ente les que destaca Obeliscu, en Candás, o Megáfonu, nel Campus d'El Milán d'Uviéu.