El Ministeriu de Ciencia, Innovación y Universidá (MICIU) reconoció a la Oficina de Tresferencia de Conocencia de la Universidá d'Uviéu pol so esfuerzu para treslladar les resultancies d'investigación al sector granible. La universidá asturiana ye la única institución del Principáu que figura ente les 111 entidaes rexistraes pol Gobiernu central en tol país.

Esti procesu de reconocencia y rexistru, al que se presentaron un total de 127 entidaes, respuende al nuevu real decretu pa potenciar les unidaes o entidaes dedicaes a la función de tresferencia y supon un cambéu respecto al anterior rexistru d'Oficines de Tresferencia de Resultancies d'Investigación (OTRI). El ministeriu informó de que'l rexistru sigue abiertu pa integrar -previa evaluación- a otres entidaes que deseyen formar parte.

Susana Luque, vicerrectora de Tresferencia y Relaciones cola Empresa, destacó que, pa la universidá asturiana, ye motivu d'arguyu ser reconocida pol so trabayu pa llevar la investigación y l'innovación al texíu granible. Luque sorrayó que les universidaes tienen la misión d'avanzar non solo na docencia ya investigación, sinón tamién na tresferencia de la conocencia, una pilastra básica que, n'ocasiones, escaezse. La vicerrectora resaltó que la Universidá Uviéu fixo nos últimos años un esfuerzu importante nesti sentíu al amontar el númberu de les sos cátedres d'empresa hasta llegar a les 44 y caltener alcuerdos con más de 500 empreses collaboradores.  

Les Oficines de Tresferencia de Conocencia (OTC) son axentes clave na conexón ente les entidaes xeneradores de conocencia y el sector granible, como elementu esencial p'amontar les capacidaes innovadores españoles y aumentar el so impactu na crecedera y el bienestar social. La so actividá toma dende la detección de les resultancies d'investigación y la so protección llegal, hasta la so comercialización per distintes víes, como les llicencies d'esplotación, la investigación colaborativa ente entidaes públiques y privaes, la contratación de servicios d'I+D+I y tecnolóxicos, o la creación y/o participación n'entidaes basaes na conocencia. Los datos apurríos poles entidaes inscrites nel rexistru van favorecer el diseñu y ellaboración de polítiques públiques pal impulsu de la tresferencia de conocencia.

Del total d'entidaes inscrites nel Rexistru d'Oficines de Tresferencia de Conocencia del MICIU, hai 55 universidaes, 26 centros tecnolóxicos y de sofitu a la innovación tecnolóxica y de sofitu a la innovación tecnolóxica, 11 entidaes sanitaries, 7 organismos d'I+D rexonales, 5 organismos d'I+D estatales y 7 entidaes d'otru tipu.